Tovdalselva

Tovdalselva frå fjell til sjø er lang, gjennom Åmli kommune er strekninga i overkant av 4 mil. Tovdalselva er for dei fleste eit kjent namn, blant anna kjent frå planar om kraftutbygging, omfattande fiskedød i 1970 åra osv. Den delen av Tovdalselva som det har vore mest debatt om er strekninga frå Rukanfossen like nord for Dale i Tovdal og vidare nordover inn i Setesdalskommunane. Kunnskapen om Tovdalselva er av denne grunn for mange i fyrste rekke knytt til den øvre delen av vassdraget.

Men Tovdalselva har mange naturperler å by på også nedover i vassdraget. Med tanke på naturopplevingar og aktivitetar knytt til vatn og vassdrag av ulike slag er moglegheitane mange med kort og lett tilgang til elva. Eit område som i særleg grad byr på mange mulighetar er strekningen frå Dølemo til Baas. Her vekslar elva frå rolege vatnspeil til fossar og stryk. Langs elvestrekninga finnast fleire imponerande minner frå den tida då tømmerfløtinga skjedde. Kraftige fløtningskjermar i hoggen stein fortel om fagarbeid av høg klasse. Og med dei hjelpemidla som då fantes kan ein bare tenke seg kva fysisk slit som ligg bak desse byggverka. Like vest for Dølemo sentrum finn ein restane av den gamle byvegen i form av brukar frå ei bru som kryssa elva. Langs elva finnast også godt synlege merker etter gamle ferdselsvegar frå den tida hesten var einaste trekkrafta.

Tovdalselva frå Dølemo til Baas har mykje å tilby menneske som søker ut i naturen. I tillegg til sjølve naturopplevinga gjev elvestrekningen høve til aktivitetar av ulike slag. Elva er svært fiskerik med aure som viktigaste art, men det er også eit visst innslag av bekkerøye og abbor. Fiskekortordning er under etablering og elva bør gje gode moglegheitar for alt frå flugefiske til stangfiske med beitemakk.

"Brufoss"
Foto: Jens M. Føreland

Elva er godt egna for båtbruk, men sjå opp for fossar og stryk. Kvart år ser ein kanoar som fylgjer elva nedover, og områda frå Dølemo og sørover i ein strekning på 8 – 10 km til Flateland Camping er utan fossar og stryk. Bademoglegheitar finnast overalt, og områda inntil elva gjev mange moglegheitar for rasting og telting for dei som vil overnatte under enkle tilhøve.

Den delen av Tovdalselva som særleg er omtala her, strekninga frå Dølemo til Baas, er ikkje så synleg frå riksvegen som store delar av elva ellers er når ein kjører til Dølemo og tar av vestover mot Tovdal. Men elva ligg sjeldan meir enn 200 – 300 meter frå vegen. Ta kontakt med dei som driv Dølemo Landhandel for meir informasjon, der får du også kjøpt fiskekort dersom du er interessert i fisking.

"Øykil"
Foto: Jens M. Føreland

Til deg, som etter å ha lese denne enkle presentasjonen av ein del av Tovdalselva, kunne tenke deg å sjå nærare på området. Ta med deg fiskestonga, kanoen, heile familien og gjer eit forsøk, du blir truleg ikkje skuffa. For den "blaserte" fiskar som ventar fisk på kiloen og meir, så er det langt mellom desse, men dei finnast. Men kanskje småjenta eller småguten din er nøgd med mindre utgåver, og då er moglegheitane store for eit heldig utfall. For deg som vil bruke elva og områda inntil, tak omsyn til naturen, hold deg til reglane i Friluftslova for ferdsel og telting i utmark, vær spesielt forsiktig med open varme og hugs at det beiter husdyr i nærleiken slik at hunden må haldast under kontroll.